Deputeti i LDK-së thotë se koalicioni është afër

Eksponentë të LDK-së bëjnë me dije se koalicioni me Vetëvendosjen është pranë, përkundër zërave që duan dëmtimin e këtij procesi.

Deputeti i Lidhjes Demokratike të Kosovës, Haxhi Avdyli, po thotë se koalicioni në mes të Lëvizjes Vetëvendosje dhe Lidhjes Demokratike të Kosovës është shumë afër.

Një gjë të tillë Avdyli e thotë duke përmendur reagimet e ashpra që po vijnë nga Partia Socialdemokrate dhe PDK-AAK e NISMA. Sipas tij reagimet me plotë nervozitet ndaj mundësisë së arritjes së koalicionit Kurti-Mustafa dëshmojnë që puna është mirë.

Sipas Avdylit ndryshimi që po ndodh në Kosovë po iu dhemb shumë PSD-së e PAN-it. “Si të shihni që politikanët e PAN-it e PSD-së , dhe të ” pavarurit ” e varur nga ata, të shkruajnë zi e terr e me nervoz ndaj mundësisë së koalcionit VV-LDK, kuptone që puna është mirë. Ndryshimi po iu dhemb shumê”, ka shkruar Avdyli.

Nga PSD dhe PAN-i kanë reaguar ndaj raportimeve të mbrëmshme për një takim ndërmjet Albin Kurtit dhe Isa Mustafës në shtëpinë e këtij të fundit në Prapashticë. Nga PSD e kanë quajtur si ‘koalicion i rançit të Prapashticës”./